(2015-08-05) 好心你幾廿歲就唔好咁多幻想啦

不知道大家有沒留意，時不時都會見到一些公公婆婆在街邊賣看來冇人想買的東西，應該係話，冇人想在當街當巷買的東西。在馬鞍山，有時會見到賣指甲鉗、碗筷、CLASSIC收音機都有，天時暑熱，真係會有人唔買都睇下﹖﹗有時我都有點懷疑

今日跟內子行過一個地方，就見到有婆婆在擺檔，那位置上蓋是私人屋苑，但在巴士總站旁，不知算是私人定公眾地方。見到婆婆在賣大蕉，但經過時就發現D蕉都幾黑...

 我就覺得很懷疑，D蕉黑到咁，會唔會有人買，然後繼而再諗婆婆一個人坐在大街，看著人來人往，如果冇人買，又要捧著一大袋物資回家，回到家又要解決生計問題...

內子話，早前睇過一篇報導，講述有位年過半白的老人家在街擺賣饅頭，但因為雙眼問題，根本看不到饅頭其實已經霉爛，所以一直乏人問津。有人看到這情況，一口氣買下所有饅頭，那老人家才笑逐顏開

內子話，會不會這婆婆都有這情況，看不到蕉已經黑哂呢?

在等車中途，我同內子講，不如轉頭睇下婆婆那邊有咩可以買返家，然後內子塞左一舊水俾我

其實我驚婆婆鬧我做乜影相

去到婆婆檔口，有個菲傭正在揀緊婆婆賣的蔬菜(原來有菜賣架...)，盛惠25蚊。我在睇緊仲有咩賣之際，突然出現位師奶行埋婆婆度，應該同我一樣，想睇下有咩賣，婆婆在落力SERVE她。再然後，又出現多一個師奶，揀左一會，揀左三條蕉，盛惠5蚊。

揀蕉時，她同我講：佢D蕉幾靚架，唔好睇外表好似好黑，全部都Organic，好好食架，我屋企唔會食，係得我食，次次我都幫佢買架，試下啦細佬

 我傻眼了，原來婆婆有捧場客，之前的懷疑原來全部都是假想，既然有口碑，師奶又識講Organic(非一般師奶)，仲叫我細佬，OKAY，我買30蚊蕉，唔該婆婆幫我執啦

婆婆執好後，話送多隻俾我，多謝，跟住又送多隻，多謝﹗

完全沒考慮過點樣清哂呢堆蕉...

返到家，開一隻黎食，唔...又唔會話太差的，都是有少少爛，同一般大蕉分別不大，試下同自己講：是Organic架，應該鼓勵到放入口

一路食，一路浮現張圖：好心你幾廿歲就唔好咁多幻想啦，人地老人家自力更生，活得好過你呀