(2015-04-13) 最後我跟他講，你果然是一名香港人

今晚跟幾個好耐沒見、一起上堂的同事去吃飯，聚舊起來，相當頗愉快的，而且都留意到身邊盡是典型的香港人

在整個飯局裡，大家都在分享自己的工作點滴，而在我們6人當中，有一位即將再入學堂，成為見習督察(PI)，我們當然為他高興，而另一位同事似乎都有意投考PI

當我們聊到有位朋友現時是消防督察，現住九龍塘逾千呎的宿舍，他似乎又有意想投考

這下有點令人猜疑了，到底他想考邊飯呢?再回想起他今晚的話題，會問下你在有沒獲讚賞、工作得心應手、簽簿簽左幾多、有沒去旅行
 
「讚賞?冇喎，工作環境不同，自然冇太多野可以做到」
「哦係呀，我返左兩星期工已經拿了complement，而家應該有4張了」
 
「工作呀，Er...有D吃力呀，唔係話唔得，只是做admin煩複左少少」
「下?! admin好煩咩，黎黎去去都係咁咋喎」

「簽簿?一半咁上下」
「係呀...我差唔多簽哂啦喎」

「旅行唔去住啦，邊有咁多錢」
「呢一年唔去就蝕啦，我那邊有個新同事本來都唔諗住去旅行，但聽完我講之後都去左一轉台灣，我地有一年蜜月期，緊係要去旅行，遲下邊有時間去」

以上的對話只是其中一部份話題，還有如問別人月入比伴侶多會否令對方覺得自卑、你同伴侶開左個聯名戶口，你們每月各自會擺幾多錢落去、你同伴侶出街食飯係咪通常由男方請，女方會否請定AA制(他話他跟伴侶雖然沒特定方式，但在概率計算下，比例大約為2:1)

很明白取下經是好正常的事，然而這些問題其實都頗個人的，而且好似有點偏離了事物本身的原意，而又將自己跟別人對比

點解考督察已經不算是一個問題，但點解連食餐飯都要計住今餐邊個俾下次邊個俾?點解連開聯名戶口都要問放幾多錢入去作二人共同開支(這個真係唔明白，都未同居)?點解每一樣都要計算?

難道就沒有自己的想法?

生活在香港地，其他東東你可以不認識，但自己的福利一定要知道，最好滾瓜爛熟，不熟悉有如犯下彌天大罪

我遇過不少朋友，為了個人利益，真是好似R穿褲袋般將福利有咁盡拿得咁盡，好清楚自己大假有多少，唔蝕得，蝕左當你仇家咁看待

從少我們就被灌輸一種機械教育：細個讀多D書，第時讀完大學出黎搵多D錢，然後成家立室，建立小康之家，生返一兩個，再灌輸下一代，細個讀多D書...

人大左，緊係要結婚啦，我鋪定架啦，28歲一定結婚，唔早架啦，結婚有宿舍呀嘛，緊係唔好執輸，福利黎架嘛，生多幾個仔女，拿高D分排前D，仲快點拿到

在我寫《回到起步時》劇本時，我不停反覆想著同一個問題，除了錢，香港人還有甚麼?

香港的教育、文化，教育了我們甚麼﹖

又其實，那些看來對自己沒信心的人，他們感不感覺到自己的靈魂﹖



最後我跟他講，你果然是一名香港人